കാണാതായ വിദ്യാർത്ഥിയെ സുരക്ഷിതനായി കണ്ടെത്തി

ചിറ്റൂർ ബോയ്സ് ഹൈസ്കൂൾ വിദ്യാർത്ഥി ഹരീഷ് തമിഴ്നാട്ടിലെ സൂലുരിൽ കണ്ടെത്തി; കുടുംബത്തിനും നാട്ടുകാർക്കും ആശ്വാസം

പാലക്കാട്: ചിറ്റൂർ ബോയ്സ് ഹൈസ്കൂളിലെ ഒമ്പതാം ക്ലാസ് വിദ്യാർത്ഥിയായ ഹരീഷിനെ തമിഴ്നാട്ടിലെ കോയമ്പത്തൂർ സമീപത്തെ സൂലുരിൽ സുരക്ഷിതനായി കണ്ടെത്തി. കാണാതായ വിവരം പുറത്തുവന്നതോടെ ആശങ്കയിലായിരുന്ന കുടുംബത്തിനും നാട്ടുകാർക്കും ആശ്വാസമായാണ് കുട്ടിയെ കണ്ടെത്തിയ വാർത്ത എത്തിയത്.

ഇന്നലെ രാത്രി തമിഴ്നാട് ഹൈവേ പട്രോളിംഗ് പൊലീസ് സൂലുർ മേഖലയിൽ നടത്തിയ പതിവ് പരിശോധനയ്ക്കിടെയാണ് ഹരീഷിനെ കണ്ടെത്തിയത്. സംശയം തോന്നിയതിനെ തുടർന്ന് കുട്ടിയോട് വിവരങ്ങൾ അന്വേഷിച്ച പൊലീസ്, തുടർന്ന് ചിറ്റൂർ പോലീസ് സ്റ്റേഷനിലും കുടുംബാംഗങ്ങളെയും വിവരം അറിയിക്കുകയായിരുന്നു.

വിവരമറിഞ്ഞ ഉടൻ ചിറ്റൂർ പൊലീസും ഹരീഷിന്റെ ബന്ധുക്കളും തമിഴ്നാട്ടിലെത്തി കുട്ടിയെ ഏറ്റുവാങ്ങി. ആവശ്യമായ നടപടികൾ പൂർത്തിയാക്കിയ ശേഷം ഹരീഷിനെ സുരക്ഷിതമായി നാട്ടിലേക്ക് കൊണ്ടുവന്നു.

കുട്ടിയുടെ ആരോഗ്യനില തൃപ്തികരമാണെന്നും കൂടുതൽ വിവരങ്ങൾ പൊലീസ് പരിശോധിച്ചുവരികയാണെന്നും അധികൃതർ അറിയിച്ചു.

ഹരീഷിനെ സുരക്ഷിതമായി കണ്ടെത്തുന്നതിൽ നിർണായക പങ്കുവഹിച്ച തമിഴ്നാട് ഹൈവേ പട്രോളിംഗ് പൊലീസിനും, അന്വേഷണത്തിന് നേതൃത്വം നൽകിയ ചിറ്റൂർ പൊലീസിനും കുടുംബം ഹൃദയപൂർവ്വം നന്ദി അറിയിച്ചു. നാട്ടുകാരും വിവിധ സന്നദ്ധ പ്രവർത്തകരും കുട്ടിയെ കണ്ടെത്താൻ നൽകിയ പിന്തുണയ്ക്കും കുടുംബം നന്ദി രേഖപ്പെടുത്തി.