തിരുവനന്തപുരം കല്ലമ്പലത്ത് കെ.എസ്.ആർ.ടി.സി ബസ് കണ്ടെയ്‌നർ ലോറിക്ക് പിന്നിലിടിച്ചു; 10 പേർക്ക് പരിക്ക്

*_15-05-2026 വെള്ളി_*

തിരുവനന്തപുരം: കല്ലമ്പലത്തിന് സമീപം കെ.എസ്.ആർ.ടി.സി സൂപ്പർ ഫാസ്റ്റ് ബസ് കണ്ടെയ്‌നർ ലോറിക്ക് പിന്നിലിടിച്ച് അപകടം. എറണാകുളത്ത് നിന്ന് തിരുവനന്തപുരത്തേക്ക് പോവുകയായിരുന്ന ബസാണ് അപകടത്തിൽപ്പെട്ടത്. ബസിലുണ്ടായിരുന്ന പത്തോളം യാത്രക്കാർക്ക് പരിക്കേറ്റു.

പരിക്കേറ്റ പത്ത് യാത്രക്കാരെയും ഉടനടി പാരിപ്പള്ളി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ലെന്നാണ് പ്രാഥമിക വിവരം.

മേഖലയിൽ ഇന്നലെ രാത്രി മുതൽ പെയ്യുന്ന മഴയെത്തുടർന്ന് റോഡിലുണ്ടായ വഴുക്കലിൽ ബസ് നിയന്ത്രണം വിട്ട് മുന്നിലുണ്ടായിരുന്ന കണ്ടെയ്‌നറിലേക്ക് ഇടിച്ചു കയറുകയായിരുന്നു എന്നാണ് പ്രാഥമിക നിഗമനം.

ഇടിയുടെ ആഘാതത്തിൽ ബസിന്റെ മുൻഭാഗം പൂർണ്ണമായും തകർന്നു. എന്നാൽ കണ്ടെയ്‌നർ ലോറിക്കോ അതിന്റെ ഡ്രൈവർക്കോ പരിക്കുകളില്ല. ലോറി റോഡരികിലേക്ക് മാറ്റി നിർത്തിയിരിക്കുകയാണ്.

സംഭവസ്ഥലത്ത് കല്ലമ്പലം പോലീസും ഫയർഫോഴ്സും എത്തി മേൽനടപടികൾ സ്വീകരിച്ചു. അപകടത്തെക്കുറിച്ച് കൂടുതൽ അന്വേഷണം നടന്നുവരികയാണ്.