അടൂരിലെ ഷഹാനയുടെ മരണം ആൺസുഹൃത്ത് അരുൺ അറസ്റ്റിൽ

അടൂർ കോട്ടമുകളിൽ യുവതിയെ വീടിനുള്ളിൽ മരിച്ച നിലയിൽ കണ്ടെത്തിയ സംഭവത്തിൽ ആൺസുഹൃത്ത് അറസ്റ്റിൽ. ഏഴംകുളം സ്വദേശിയായ അരുൺ ആണ് അടൂർ പോലീസിന്റെ പിടിയിലായിരിക്കുന്നത്. ആത്മഹത്യാ പ്രേരണാ കുറ്റം ചുമത്തിയാണ് ഇയാൾക്കെതിരെ പോലീസ് കേസെടുത്തിരിക്കുന്നത്.

സ്വകാര്യ ധനകാര്യ സ്ഥാപനത്തിലെ ജീവനക്കാരിയായ ഷഹാനയെ കഴിഞ്ഞ തിങ്കളാഴ്ച രാത്രിയാണ് വീടിനുള്ളിൽ തൂങ്ങിമരിച്ച നിലയിൽ കണ്ടെത്തിയിരിക്കുന്നത് . മരണത്തിന് തൊട്ടുമുമ്പ് വീടിനുള്ളിൽ വെച്ച് ഷഹാനയും അരുണും തമ്മിൽ കയ്യാങ്കളിയും വഴക്കുമുണ്ടായതായി പോലീസ് കണ്ടെത്തിയിരുന്നത്. പ്രതി ഷഹാനയെ ക്രൂരമായി മർദിച്ചിരുന്നതായും ഇതാണ് യുവതിയെ ജീവനൊടുക്കാൻ പ്രേരിപ്പിച്ചതെന്നുമാണ് പോലീസിന്റെ നിഗമനം. കേസിൽ കൊലപാതക സാധ്യതയടക്കം ബന്ധുക്കൾ ആരോപിച്ചിരുന്നെങ്കിലും, പോസ്റ്റ്‌മോർട്ടം പരിശോധനയിൽ ഇത് ആത്മഹത്യ തന്നെയെന്ന് പോലീസ് പ്രാഥമികമായി സ്ഥിരീകരിച്ചിരിക്കുന്നത്. തുടർന്ന് നടത്തിയ വിശദമായ ചോദ്യം ചെയ്യലിനൊടുവിലാണ് അരുണിന്റെ അറസ്റ്റ് രേഖപ്പെടുത്തിയിരിക്കുന്നത്.