ലഹരിക്കേസിൽ നടി അഞ്ജു കൃഷ്ണ അറസ്റ്റിൽ. പിടികൂടിയതില്‍ മെത്താംഫെറ്റാമൈനും എല്‍എസ്‌ഡി സ്റ്റാംപും

മെത്താംഫെറ്റമിൻ, എൽഎസ്ഡി സ്റ്റാംപുകൾ, കഞ്ചാവ് തുടങ്ങിയവയുമായി ലഹരി കൈമാറാനെത്തിയ മലയാളത്തിലെ യുവനടി അഞ്ജു കൃഷ്ണയും സംഘവും ചെന്നൈയിൽ പിടിയിൽ.

ആൻ്റി നാർക്കോട്ടിക് ഇന്റലിജൻസ് യൂണിറ്റ് ആവശ്യക്കാരെന്ന വ്യാജേന എത്തി വലവിരിച്ചാണ് സംഘത്തെ കുടുക്കിയത്. തമിഴ് ചിത്രം 'വെള്ളിമലൈ', ജോജു ജോർജ് ചിത്രം 'ആരോ' എന്നിവയിലൂടെ ശ്രദ്ധേയയായ നടിയാണ് അഞ്ജു കൃഷ്ണ. അഞ്ജുവിനൊപ്പം തമിഴ് സിനിമയിലെ സഹസംവിധായിക വിൻസി നിവേദ ഉൾപ്പെടെ എട്ടുപേരെയാണ് പോലീസ് അറസ്റ്റ് ചെയ്തിട്ടുള്ളത്.

നെശപ്പാക്കം സ്വദേശി വിഘ്‌നേശ്വരനെ ചോദ്യം ചെയ്തതിൽ നിന്നാണ് ലഹരി സംഘത്തെക്കുറിച്ച് പോലീസിന് കൃത്യമായ വിവരം ലഭിക്കുന്നത്. തുടർന്ന് പോലീസ് സംഘം തന്ത്രപൂർവം ഇവരെ സമീപിക്കുകയായിരുന്നു. ലഹരി കൈമാറാൻ വത്സരവാക്കത്ത് എത്തിയപ്പോഴാണ് സംഘം പോലീസിന്റെ പിടിയിലായത്. ഇവരിൽ നിന്ന് വലിയ അളവിൽ മെത്താംഫെറ്റമിനും മറ്റ് മയക്കുമരുന്നുകളും പോലീസ് കണ്ടെടുത്തിട്ടുണ്ട്.