മണിയൻ പിള്ള രാജു അറസ്റ്റിൽ.അപകടം നടന്ന കാർ നിർത്താതെ പോയതിനാണ് അറസ്റ്റ്

നടനും നിർമാതാവുമായ മണിയൻപിള്ള രാജു ഓടിച്ച കാർ ഇടിച്ച് രണ്ട് ബൈക്ക് യാത്രികർക്ക് പരിക്കേറ്റ സംഭവത്തിൽ എഫ്‌ഐആർ വിവരങ്ങൾ പുറത്ത്. താരത്തിനെതിരെ മൂന്ന് ഗുരുതര കുറ്റങ്ങളാണ് മ്യൂസിയം പോലീസ് ചുമത്തിയിരിക്കുന്നത്. വാഹനം അപകടകരമായ രീതിയിൽ ഓടിച്ച് ജീവഹാനിക്ക് കാരണമാകുക, അപകടമുണ്ടാക്കിയ ശേഷം വാഹനം നിർത്താതെ പോകുക, ഉത്തരവാദിത്തപ്പെട്ടവരെ വിവരം അറിയിക്കാതിരിക്കുക എന്നീ വകുപ്പുകൾ പ്രകാരമാണ് കേസെടുത്തിരിക്കുന്നത്.

ബുധനാഴ്ച രാത്രി 10 മണിയോടെ വഴുതക്കാട് ട്രിവാൻഡ്രം ക്ലബിന് മുന്നിലായിരുന്നു അപകടം നടന്നത് .മണിയൻ പിളള രാജു സുബ്രഹ്മണ്യം ഹാളിലെ ചടങ്ങ് കഴിഞ്ഞ് മടങ്ങുകയായിരുന്നു. ഇദ്ദേഹത്തിന്റെ കാർ ഇടിച്ച് ബൈക്ക് യാത്രക്കാരായ നിവേദിത് കൃഷ്ണയ്ക്കും സൂരജിനും ഗുരുതരമായി പരുക്കേറ്റു. നിവേദിതിന്റെ കാലുകൾക്കും സൂരജിന്റെ നട്ടെല്ലിനുമാണ് ഒടിവുള്ളത്. ഇരുവരും സ്വകാര്യ ആശുപത്രിയിൽ ചികിത്സയിലാണ്.