പാലക്കാട് ജില്ലയിൽ വീണ്ടും എച്ച്1എൻ1 (H1N1) മരണം സ്ഥിരീകരിച്ചു.

കരിമ്പുഴ എളമ്പുലാശ്ശേരി സ്വദേശിയായ 77 വയസ്സുകാരനാണ് പനി ബാധിച്ച് മരിച്ചത്. പെരിന്തൽമണ്ണയിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് അദ്ദേഹത്തിന്റെ അന്ത്യം സംഭവിച്ചത്. മരണശേഷം ആരോഗ്യവകുപ്പ് നടത്തിയ സാമ്പിൾ പരിശോധനയിലാണ് എച്ച്1എൻ1 ബാധ സ്ഥിരീകരിച്ചത്. പകർച്ചവ്യാധി വ്യാപനത്തിന് ശേഷം പാലക്കാട് ജില്ലയിൽ റിപ്പോർട്ട് ചെയ്യുന്ന രണ്ടാമത്തെ എച്ച്1എൻ1 മരണമാണിത്. ഏതാനും ദിവസങ്ങൾക്ക് മുൻപ് കുമരംപുത്തൂർ സ്വദേശിയും എച്ച്1എൻ1 ബാധിച്ച് മരിച്ചിരുന്നു. എച്ച്1എൻ1 കൂടാതെ ജില്ലയിൽ ഡെങ്കിപ്പനി ബാധയും കടുത്ത ആശങ്ക ഉയർത്തുന്നുണ്ട്. ഈ മാസം മാത്രം പാലക്കാട് ജില്ലയിൽ ഡെങ്കിപ്പനി ബാധിച്ച് നാല് പേർ മരണപ്പെട്ടിട്ടുണ്ട്. പനി ബാധിതരുടെ എണ്ണം ഉയരുന്ന സാഹചര്യത്തിൽ ആരോഗ്യവകുപ്പ് ജില്ലയിൽ പ്രതിരോധ പ്രവർത്തനങ്ങളും ജാഗ്രതാ നിർദ്ദേശങ്ങളും ശക്തമാക്കിയിട്ടുണ്ട്