എൻട്രൻസ് പരീക്ഷയ്ക്ക് വിദ്യാർത്ഥിയുടെ പൂണൂൽ അഴിപ്പിച്ചു. കർണാടകയിൽ മൂന്ന് ജീവനക്കാർക്ക് സസ്പെൻഷൻ.

കർണാടക കോമൺ എൻട്രൻസ് ടെസ്റ്റ് (കെസിഇടി) പരീക്ഷയ്ക്കിടെ വിദ്യാർത്ഥികളുടെ പൂണൂൽ അഴിപ്പിച്ച സംഭവത്തിൽ മൂന്ന് കോളേജ് ജീവനക്കാർക്കെതിരെ കർശന നടപടി എടുത്തു . ബെംഗളൂരു കോറമംഗലയിലെ കൃപാനിധി പ്രീ-യൂണിവേഴ്സിറ്റി കോളേജിലെ ജീവനക്കാരായ സുദേവീർ ഡി, എ സരിത, ഗിരിജ എന്നിവരെയാണ് സർവീസിൽ നിന്നും സസ്‌പെൻഡ് ചെയതിരിക്കുന്നത്. മതവികാരം വ്രണപ്പെടുത്തിയെന്ന പരാതിയിൽ ഇവർക്കെതിരെ കേസെടുക്കുകയും അറസ്റ്റ് രേഖപ്പെടുത്തുകയും ചെയ്തിട്ടുണ്ട്.

കഴിഞ്ഞ ഏപ്രിൽ 23-ന് ഫിസിക്സ് പരീക്ഷ എഴുതാനെത്തിയ മൂന്ന് വിദ്യാർത്ഥികളെയാണ് പരിശോധനയുടെ പേരിൽ ജീവനക്കാർ തടഞ്ഞുവെച്ചിരിക്കുന്നത്. പൂണൂൽ നീക്കം ചെയ്യാതെ പരീക്ഷാ ഹാളിലേക്ക് പ്രവേശിപ്പിക്കില്ലെന്ന് ജീവനക്കാർ നിലപാടെടുത്തു. തുടർന്ന് പരീക്ഷ മുടങ്ങാതിരിക്കാൻ വിദ്യാർത്ഥികൾക്ക് പൂണൂൽ അഴിച്ചുമാറ്റേണ്ടി വന്നു. പരീക്ഷയ്ക്ക് ശേഷം വിദ്യാർത്ഥികളും മാതാപിതാക്കളും പോലീസിൽ പരാതി നൽകിയതോടെയാണ് സംഭവം പുറംലോകമറിഞ്ഞിരിക്കുന്നത്.