കുമ്പള ആരിക്കാടിയിലെ താത്കാലിക ടോള്‍ പ്ലാസയുടെ പ്രവര്‍ത്തനം അവസാനിപ്പിക്കുന്നു

കാസര്‍ഗോഡ്: ജനരോഷം ശക്തമായ കാസര്‍ഗോഡ് കുമ്പള ആരിക്കാടിയിലെ താത്കാലിക ടോള്‍ പ്ലാസയുടെ പ്രവര്‍ത്തനം പൂര്‍ണ്ണമായും അവസാനിപ്പിക്കുന്നു. അടുത്ത അഞ്ച് മണിക്കൂറിനുള്ളില്‍ ടോള്‍ പിരിവ് പൂര്‍ണ്ണമായും നിലയ്ക്കും. കേന്ദ്രമന്ത്രി ഹര്‍ഷ് മല്‍ഹോത്രയാണ് ഇക്കാര്യം ഔദ്യോഗികമായി അറിയിച്ചത്. നിതിന്‍ ഗഡ്കരി രൂപീകരിച്ച പ്രത്യേക സമിതിയുടെ ശുപാര്‍ശ പ്രകാരമാണ് നടപടി. തിരഞ്ഞെടുപ്പ് മുന്നില്‍ കണ്ടുള്ള തീരുമാനമല്ല ഇതെന്ന് കേന്ദ്രമന്ത്രി വ്യക്തമാക്കി.
ടോള്‍ പൂട്ടിക്കാന്‍ ഇടപെട്ടത് രാജീവ് ചന്ദ്രശേഖറും ജില്ലാ നേതൃത്വവുമാണെന്ന് ബിജെപി ജില്ലാ അധ്യക്ഷ എം.എല്‍. അശ്വിനി പറഞ്ഞു. കഴിഞ്ഞ വര്‍ഷം മെയ് മുതല്‍ ജില്ലാ കമ്മിറ്റി നടത്തിയ ഇടപെടലുകള്‍ അവര്‍ വിശദീകരിച്ചു. സെപ്റ്റംബറില്‍ തന്നെ രാജീവ് ചന്ദ്രശേഖര്‍ നിതിന്‍ ഗഡ്കരിക്ക് കത്ത് നല്‍കിയിരുന്നു.ടോള്‍ പ്ലാസ നിര്‍ത്തലാക്കിയതിന്റെ ക്രെഡിറ്റിനെച്ചൊല്ലി ബിജെപിയില്‍ ആഭ്യന്തര തര്‍ക്കം രൂക്ഷമാകുന്ന സൂചനകളാണ് പുറത്തുവരുന്നത്.