ഇസ്ലാമിക് റവല്യൂഷണറി ഗാർഡ് കോർപ്സിന്റെ ഉന്നതതല യോഗം വിളിച്ച് ഇറാൻ

മേഖലയില്‍ യുദ്ധഭീതിയും സംഘര്‍ഷാന്തരീക്ഷവും നിലനില്‍ക്കുന്ന സാഹചര്യത്തിൽ ഇസ്ലാമിക് റെവല്യൂഷണറി ഗാര്‍ഡ് കോര്‍പ്സിന്റെ (ഐആര്‍ജിസി) ഉന്നതതല യോഗം വിളിച്ച് ഇറാന്‍. 'നാഷണല്‍ ഗാര്‍ഡ്സ് ഡേ' യോടനുബന്ധിച്ച് നടന്ന ഒത്തുചേരലില്‍ വിപ്ലവ ഗാര്‍ഡിന്റെ നിലവിലെ കമാന്‍ഡര്‍മാരും മുന്‍ മേധാവിമാരും പങ്കെടുത്തതായി ഇറാന്‍ മാധ്യമങ്ങള്‍ റിപ്പോര്‍ട്ട് ചെയ്യുന്നു.

ഐആര്‍ജിസി ചീഫ് കമാന്‍ഡര്‍ മേജര്‍ ജനറല്‍ ഹുസൈന്‍ സലാമിയുടെ നേതൃത്വത്തിലായിരുന്നു യോഗം നടന്നത്. മുന്‍ കമാന്‍ഡര്‍മാരായ മേജര്‍ ജനറല്‍ മൊഹ്സെന്‍ റെസായി, മേജര്‍ ജനറല്‍ യഹ്യ റഹീം സഫവി, മേജര്‍ ജനറല്‍ മുഹമ്മദ് അലി ജാഫരി എന്നിവരും യോഗത്തില്‍ പങ്കെടുത്തു.

ശത്രുക്കളുടെ ഗൂഢാലോചനകളെ നേരിടുവാന്‍ ഇറാനിയന്‍ സായുധ സേനകള്‍ പൂര്‍ണ സജ്ജമാണെന്നും ഒറ്റക്കെട്ടാണെന്നും യോഗം വിലയിരുത്തി. ഏത് തരത്തിലുള്ള ആക്രമണത്തെയും ചെറുക്കാന്‍ സേന തയ്യാറാണ്. ശത്രുരാജ്യങ്ങള്‍ നടത്തുന്ന മാനസിക യുദ്ധങ്ങളെയും ഭീഷണികളെയും ഇറാന്‍ ഭയപ്പെടുന്നില്ലെന്നും കമാന്‍ഡര്‍മാര്‍ വ്യക്തമാക്കി.